NASA 900,000 GCASH ACCOUNTS, SINUSPINDE DAHIL SA KAHINA-HINALANG AKTIBIDAD

Photo: fintechnews.ph

Ruth Jamiel A. Ceniza

Sa tulong ng National Bureau of Investigation (NBI), at Philippine National Police (PNP), tinatayang umabot sa 900,000 accounts na ang sinuspinde ng GCash sa unang kwarter ng taon dahil sa kahina-hinalang aktibidad, o ‘fraudulent aactivities’ buhat ng mga scammers.

Ayon sa kumpanya, mahalaga na agad maaksyunan ang nasabing isyu upang maprotektahan ang kanilang mga users, lalo pa at laganap ang mga iba’t ibang modus ng scammers sa online platforms.

“It is crucial that we work together to protect the platform against fraud. As we continue to bolster our security system, we are also counting on the support of our customers and ask that they be vigilant against online scam,” ani Martha Sazon, GCash President at Chief Executive Officer ng nasabing e-wallet company sa isang email statement.

Nagbigay-paalala rin ang kumpanya sa publiko na ugaliing huwag magbigay ng personal na detalye ng kanilang accounts tulad ng Marketing Partner Identification Number (MPIN), at maging maingat sa mga transaksyong isinasagawa gamit ang app.

Sakaling panggalingan ng mga kahina-hinalang aktibidad ang isang account, o ‘di kaya ay mabiktima ng isang scammer ang account user, maaari itong i-report sa bagong beta chatbot ng Gcash upang kaagad na mabigyang-solusyon ang kaso.