SULFUR DIOXIDE EMISSION SA BULKANG TAAL, TUMAAS

Marlon Luistro

Tumaas ang sulfur dioxide emission sa Bulkang Taal nitong Huwebes.

Sa inilabas na advisory ng Phivolcs kaninang alas-7 ng gabi, sinabi nitong nakapagtala ng 10,718 tonnes ng volcanic sulfur dioxide emission mula sa Taal Main Crater na lumikha ng volcanic smog o vog sa Taal Caldera.

Umabot din sa 6,612 tonnes kada araw ang average ng ibinubugang sulfur dioxide ng bulkan ngayong buwan ng Setyembre at patuloy na tumataas ang emission mula pa noong July 15, 2022.

Mula rin noong nakaraang buwan ay mayroong naobserbahang degassing activity sa proma ng upwelling ng volcanic fluids sa main crater lake at pagbuga ng naglalakihang mga steam rich plumes o usok na may taas na 2500 metro sa Taal Volcano Island.

Ngayong umaga ay namataan din ang vog ng mga residente ng bayan ng Laurel, Agoncillo at Sta. Teresita.

Babala ng Phivolcs, ang vog ay binubuo ng mga pinong droplets na naglalaman ng volcanic gas gaya ng sulfur dioxide na acidic at maaaring magdulot ng pagkairita ng mga mata, lalamunan at baga depende sa gas concentration at sa tagal ng exposure.

Sensitibo aniya sa vog ang mga may iniindang karamdaman gaya ng ashtma, lung disease at heart disease, senior citizens, buntis at mga bata.

Bilang pag iingat sa masamang epekto ng vog sa kalusugan ay pinapayuhan ang mga taong limitahan ang kanilang exposure, iwasan ang lumabas at manatili lamang sa loob ng bahay, isara ang pinto at bintana ng bahay para mablock out ang vog.

Pinapayuhan din ang mga taong magsuot ng N95 facemask, uminom ng tubig para mabawasan ang pagkairita ng lalamunan at kung kabilang sa mga sensitibong grupo ay bantayan ang sarili at humingi ng tulong sa doktor kung kinakailangan.

Ayon pa sa Phivolcs, maaari din aniyang mag-generate ng acid rain tuwing may pag-uulan at volcanic gas emission na maaaring makasira sa mga pananim at maapektuhan ang mga bubong ng bahay at gusali.

Nananatili naman sa Alert Level 1 ang Bulkang Taal at naroon pa rin ang panganib ng steam-driven o phreatic na pagputok, volcanic earthquakes, minor ashfall at pagbuga ng nakamamatay na volcanic gas.

Kayat paalala ng Phivolcs, bawal pa rin ang pumunta sa Taal Volcano Island na idineklarang permanent danger zone lalo na sa mga lugar  ng main crater at Daang Kastila Fissure.

2 TINAMAAN NG KIDLAT , 1 PATAY, 1 SUGATAN SA POLILLO ISLAND

Ylou Dagos

Nasawi ang isang senior high school student na taga Burdeos, Quezon matapos na ito at ang kanyang kasama ay tamaan ng matalim na kidlat habang sakay ng bangka patungo sa bayan ng Real, Quezon noong Martes ng gabi.

Magdadala sana ang dalawa sa kanilang mga huling pugita sa Real sakay ng bangkang de motor nang abutan ang mga ito ng ng masungit na panahon at matatalim na pagkidlat sa karagatan malapit sa bahagi ng Baluti island sa nasabing bayan dakong alas 10:00 ng gabi .

Kinilala ang nasawi na si Justine Establecida, 17 anyos, samantalang sugatan naman si Edner Tabura, parehong taga Barangay Palasan, isang islang barangay sa bayan ng Burdeos na lubos ding napinsala ng bagyong Karding.

Narescue pa ang dalawa ng mga rescuer at mga barangay official ng Real at naisugod sa ospital subalit binawian din ng buhay si Establecida.

Ginagamot pa naman si Tabura.

Batay sa impormasyon, ang pamilya ng dalawa ay kapwa mga biktima rin ng bagyong Karding at kapwa nawasak ang mga bahay.

18-ANYOS NA BABAE, PATAY SA PANANAKSAK NG KA LIVE –IN SA LAGUNA

📷 Biñan PNP

Ylou Dagos

Patay ang isang 18-anyos na babae matapos na ito at ang kanyang pinsan ay pagsasaksakin ng kanyang live-in partner sa Brgy. Langkiwa Biñan City, Laguna nitong Miyerkules ng madaling araw.

Ayon sa pulisya, matinding selos ang dahilan ng insidente.

Kinilala ang biktima na si Rochelle Ann Flores, isang estudyante.

Nagtamo ito ng tatlong panay fatal na tama ng saksak sa ibat ibang bahagi ng katawan at idineklarang dead on arrival sa ospital.

Sugatan din ang 14-anyos na pinsan nito na si Jimsher Soriaga na kasama nitong nakatira sa bahay.

Batay sa report ng Biñan City police, dakong alas 4:00 ng madaling araw nang pwersahang pasukin ng 21-anyos na suspek na si John Dave Bernabe ang bahay na tinutulugan ng mga biktima at unang sinaksak ang ka-live in at saka isinunod ang pinsan.

Mabilis itong tumakas matapos ang pananaksak subalit agad din itong naaresto sa follow up operation ng mga pulis sa Baclaran, Paranaque City.

Ayon kay PLTCOL Virgilio Jopia, hepe ng Biñan City police, nagkakalabuan na ang dalawa at gusto ng humiwalay ng biktima na siyang ikinagalit ng suspek .

Nakakulong na ang suspek sa Biñan City police station lock up cell at sinapahan na rin ng mga kasong murder at frustrated murder.

BABAENG NATANGAY NG FLASHFLOOD SA ILOG SA RIZAL AT BANGKAY NA NATAGPUAN SA QUEZON, IISA

Ylou Dagos

Kinumpirma ng mga kaanak ng babaeng naanod sa ilog sa Tanay, Rizal noong Linggo na ang biktima ay ang natagpuang bangkay noong Martes sa karagatan sa may bahagi ng Barangay Sabang Polillo, Quezon.

Nitong Miyerkules ay personal na nagtungo sa Polillo ang nanay ng biktima na si Maria Luiza, kasama ang mga imbestigador ng Tanay at Antipolo police at kinilala ang bangkay.

Kumbinsido ang nanay na iyon ang anyang anak na si Aimy Panes Laurel lalo na at magkaparehas ang kanilang suot na isang round silver na hikaw.

Si Laurel ay kabilang sa apat na magkakaanak na naanod ng flashflood sa Lanatin River sa Barangay Cayabu, Tanay noong Linggo ng gabi sa kasagsagan ng Bagyong Karding.

Nasawi sa insidente ang kanilang tatay na si Arthur Panes na siyang nagselebra ng birthday sa tabi ng ilog, samantalang nawawala pa ang kanyang mister na si Carlo Laurel.

Nailigtas naman ang 2-taong gulang na anak ng mag-asawa.

Batay sa pag-aanalisa ng mga awtoridad nasa halos 100 kilometro ang kinaanudan ng biktima na dumaan sa paliko-likong mga ilog ng Lanatin at Daraitan river sa Rizal, patungo sa Kaliwa river at Agos River na palabas sa karagatan ng General Nakar, Quezon bago naanod ng dagat patungo sa may isla ng Polillo.

Samantala ayon sa hepe ng pulisya ng Tanay, biniberipika nila ngayon ang isang bangkay ng lalaki na natgpuan sa may ilog sa Daraitan, Rizal kung ito ang nawawalang mister.

BARANGAY KAGAWAD PATAY SA PAMAMARIL SA ROSARIO, BATANGAS

Ylou Dagos

Patay ang isang barangay kagawad matapos na pagbabarilin ng dalawang hindi nakilalang salarin sa Rosario, Batangas nitong Miyerkules ng umaga.

Kinilala ang biktima na si Ismael Rosales, 50 anyos, isang negosyante, tubong Brgy. Del valle, San Antonio, Quezon at residente at barangay kagawad ng Brgy. Salao.

Batay sa report ng Rosario police, dakong alas 7:00 ng umaga, nakikipag-usap ang ang biktima sa kanyang tiyo sa harap ng tindahan ng huli, nang dumating ang mga suspek.

Naglakad ang mga ito palapit sa biktima at saka bigla na lamang pinagbabaril.

Mabilis ding tumakas ang mga ito matapos ang pamamaril at tumakbo patungo sa naghihintay na motorsiklo hindi kalayuan sa tindahan.

Subalit nasira ang kadena ng motorsiklo kaya napilitan itong iwanan ng mga suspek.

Nagtamo naman ang biktima ng mga tama ng bala sa ibat ibang bahagi ng katawan na agad nitong ikinasawi.

Narekober sa crime scene 4 na basyo ng kalibre 45 baril.

Patuloy pa ang imbestigasyon at inaalam pa ng mga awtoridad sa motibo sa krimen at kung sino ang mga suspek.

Tinutunton na rin ng mga awtoridad kung sino ang may ari ng motorsiklo.

BALIKATAN PARA SA POLILLO GROUP OF ISLANDS, RELIEF OPERATIONS PATULOY

Ylou Dagos

Patuloy ang pagpadala ng pamahalaang nasyunal sa pamamagitan ng DSWD at pamahalaang panlalawigan ng Quezon ng mga tulong sa nasalanta ng Bagyong Karding sa Polillo group of islands.

Nasa mahigit 16,000 pamilya na ang nabigyan ng mga food packs sa 5 bayan ng Polillo, Burdeos, Panukulan, Patnanungan at Jomalig.

Nitong Lunes ng gabi, nasa 4,000 pamilya sa Patnanungan at mahigit 3,000 pamilya sa Jomalig ang unang nabiyayaan ng tulong.

Sinundan agad ito ng pagpapadala ng relief goods nitong Martes para sa nasa 4,000 pamilya sa Burdeos, 4,000 pamilya sa Panukulan at paunang 1,000 para sa Polillo.

Magkatulong na rin ang PNP at AFP sa agarang pagdadala ng mga relief goods.

Gamit ang mga mga helicopters ng Philippine Airforce, mula sa Villamor airbase sa Pasay kaagad inililipad patungo sa isla ang mga tulong na nagmumula sa DSWD.

Nakaantabay naman ang PNP sa isla para sila ang magdala sa mga bayan-bayan.

Ang mga relief packs ay naglalaman ng pagkain, tubig, mga gamot, at mga damit.

📷 📹 LA Ruanto / Quezon PNP

Maging ang mga pampasaherong RORO na bumibayahe patungo sa mga isla ay libreng tumulong na rin sa paghahakot ng mga relief packs na nanggagaling naman sa kapitolyo ng Quezon.

Maging ang bayan ng General Nakar na nasa mainland ng Quezon pero isa din sa grabeng napinsala ay hinatiran na din ng mga unang pangangailangan.

Kahapon sa special session ng Sangguniang Panlalawigan, isinailalim na sa state of Calamity ang limang bayan sa Polillo Group of Islands at ang bayan ng General Nakar.

6 NA BAYAN SA QUEZON PROVINCE ISINAILALIM NA SA STATE OF CALAMITY DAHIL SA PINSALA NG BAGYONG KARDING

Allan Llaneta

Isinailalim na sa State of Calamity ang anim na bayan sa Quezon dahilan sa malalang pinsala ng nagdaang Super Typhon Karding.

Sa special na session kahapon ng Sangguniang Panlalawigan ng Quezon, pinagtibay na malagay sa State of Calamity ang mga bayan ng Polillo, Patnanungan, Panukulan, Jomalig, Burdeos at General Nakar.

Ayon kay Quezon Vice Governor Anacleto 3rd Alcala, dahilan sa naaprubahan na ang state of Calamity pwede nang gamitin ang 30 percent Quick Response Fund ng provincial government para magamit sa mga nasalanta ng bagyo.

Sa ulat ni Quezon PDRRMO Dr. Mel Avenillla, dalawang katao na ang napaulat na nasawi sanhi ng bagyo.

Sa ngayon wala pa ring suplay ng kuryente sa isla ng Polillo.

Nasa limang libong kabahayan naman ang nasira sa nagdaang bagyo.

OPISYAL AT MGA RESIDENTE NG 1 BARANGAY SA BURDEOS, QUEZON, NANAWAGAN NG TULONG PARA SA AGARANG PAGBANGON NILA SA TRAHEDYA

Ylou Dagos

Isa ang Barangay Carlagan sa bayan ng Burdeos sa pinakamatinding napinsala ng Bagyong Karding nang maglandfall ito sa nasabing bayan na nasa isla ng Polillo noong Linggo ng hapon.

Batay sa datos PAGASA sa bagyong Karding, unang tumama ang sentro ng bagyo sa kalupaan sa northeast portion ng bayan ng Burdeos kung saan naroon ang islang Barangay ng Carlagan at dalawang katabi nitong Barangay ng Mabini at Bonifacio.

Kaya naman ayon sa Quezon PDRRMO, halos 95% ng mga kabahayan dito ang nawasak.

Maging ang kanilang mga bangkang pangisda na siyang pangunahing ikinabubuhay ng mga residente doon ay halos wasak ding lahat matapos ang mga itong ipaghampasan ng malalaking alon ng karagatan.

Hindi rin nakaligtas sa lupit ng bagyo ang kanilang eskwelahan at covered court nito.

Kaya dahil sa kawalan ng pag-asa sa nakapanlulumong pangyayari, nananawagan na ang kanilang punong barangay na si Jake Lape sa lahat ng puwedeng tumulong na tulungan sila na makaahon sa trahedyang kanilang sinapit.

Damit, pagkain, tubig at mga kagamitan para mabuo muli ang kanilang mga tahanan ang hinihiling ng kapitan para sa kanyang mga kabaranggay.

Kailangan din nila anya ng kahit anong mapagsisimulan para sila makabangon.

Sa ngayon anya ay wala silang pinagkukunan ng kanilang mga pangangailangan kundi ang mga paunang tulong na ibinigay ng DSWD at pamahalaang panlalawigan at at ang kanilang napakaliit na budget ng barangay para sa quick response.

Nagpapasalamat din ang kapitan sa mga indibidwal na nagpapadala ng tulong sa kanila.

Pero ayon sa punong barangay, hindi sasapat ang mga relief goods na kanilang natatanggap ngayon sa mahaba pang panahon na kanilang kakailanganin para sila makabalik sa normal na buhay at paghahanapbuhay.

Kayat bukod sa mga relief goods, hiling ng punong barangay sa lokal at nasyunal na pamahalaan at sa iba pang LGUs na mapagkalooban sila ng mga pansamantalang mapagkikitaan para hindi sila aasa na lamang sa mga relief goods hindi rin nila alam kung hanggang kelan tatagal.

BANGKAY NG BABAE, NATAGPUANG LULUTANG-LUTANG SA KARAGATAN MALAPIT SA POLILLO , QUEZON

📷 POLILLO PNP

Ylou Dagos

Isang bangkay ng babae ang natagpuan sa karagatan sakop ng Brgy. Sabang, Polillo, Quezon nitong Martes ng umaga.

Ayon sa Polillo police, ang hindi pa nakikilalang bangkay ay posibleng biktima ng pagkalunod dahil sa pananalasa ng Bagyong Karding.

Natagpuan ng mga miyembro ng Bantay Dagat na nagsusurvey sa lugar ang lulutang-lutang na bangkay hindi kalayuan sa dalampasigan dakong alas 7:30 ng umaga.

Wala ng anumang saplot sa katawan ang labi at tanging ang suot na round silver na hikaw ang maaring pagkakilanlan dito.

Inaalam pa ng pulisya kung ang biktima ay nagmula sa isla ng Polillo at sa mga katabing lugar.

Kung sakaling biktima ito ng bagyong Karding, ito ang ikalawang matatalang casualty sa lalawigan ng Quezon.

Nakalagak ngayon ang bangkay sa isang puneraria sa bayan ng Polillo at hinihihintay na kilalanin ng kanyang mga kaanak.

TULONG PARA SA MGA NASALANTA NG BAGYONG KARDING SA POLILLO ISLAND INIHATID NA

📷 Quezon LGU

Ylou Dagos

Inihatid na sa isla ng Polillo ang ibat-ibang mga relief goods na ipamamahagi sa mga residente na naapektuhan ng pananalasa ng Bagyong Karding.

Kanina ay dumating na sa Polillo port sakay ng RORO ang karagdagang mga food packs na ihahatid sa bayan ng Burdeos, isa sa mga bayan sa isla at isa sa pinakagrabeng nagtamo ng pinsala.

📷 Quezon LGU

Nasa 4,000 food packs ang nagmula sa pamahalaang panlalawigan ng Quezon at 2,000 food packs naman ang nanggaling sa DWSD.

Ayon sa Quezon PDRRMO, aabot na sa 13,900 family food packs ang naipadala na sa isla matapos humagupit ang Bagyong Karding.

📷 Quezon LGU

Pero ayon kay Quezon Governor Angelina Tan, nasa mahigit na 50, 000 pamilya ang nangangailangan ng tulong sa mga bayan sa Polillo Group of Island, (Polillo, Burdeos, Panukulan, Patnanungan at Jomalig) at sa REINA Area (Real, Infanta at General Nakar) na mga biktima ng typhoon Karding.

Kaya humihiling ito kay DSWD Erwin Tulfo ng karagdagan pang tulong.

📷 Quezon LGU

Nagpasalamat din ang gobernador kay Sec Tulfo at DSWD, maging sa DILG sa patuloy na pagdamay sa mga biktima ng bagyo sa lalawigan.

Nakipag-usap na rin si Tan sa AFP Southern Luzon Command (SOLCOM) na nakabase sa Lucena City para sa mabilis na maihatid ang mga relief goods sa mga isolated areas sa pamamagitan ng mga chopper ng AFP.

📷 Quezon LGU

Kahapon ay nagtungo mismo si Tan sa mga naapektuhang bayan at personal na binisita ang mga residente.

Samantala, nagpadala na rin ng mga relief goods sa bayan ng Burdeos ang Angat Buhay Foundation ni dating VP Leni Robredo.

📷 Quezon LGU

Sa bayan naman ng Polillo, lubos ang pasasalamat ni Mayor Angelique Bosque sa mga NGO’s at iba pang indibidwal na nagkaloob na rin ng mga relief goods para sa nasabing bayan.

Sa Sangguniang Panlalawigan naman ng Quezon, idineklara na ang State of Calamity sa mga naapektuhang bayan base na rin sa rekomendasyon ng PDRRMO at ni Gov. Tan.